किन लम्वियो ज्ञानेन्द्रको भारत भ्रमण ?

२८ जनवरी, काठमाडौं । पूर्व राजा ज्ञानेन्द्र शाहले आफ्नो भारत भ्रमण एक साता लम्बाएका छन् । भारतीय नेताहरुसँग राजनीतिक भेटवार्ता गर्ने योजनामा रहेका उनलाई समय नमिलेपछि शुक्रबार आउने तालिका एक साताका लागि सरेको बताइएको छ । आफन्तको बिहेको निम्तो मान्न करिव तीन साता अघि ज्ञानेन्द्र भारत गएका थिए ।

ज्ञानेन्द्रका सहयोगीहरुले भाजपा नेता लालकृष्ण आडवाणी, कांग्रेस नेता दिग्बिजय सिंह लगायत केही भारतीय नेतासँग भेटवार्ताको समय मिलाइसकेको छ । आइतवारबाट राजनीतिक भेटवार्ता थाल्ने पूर्वराजाले कांग्रेस आईकी अध्यक्ष सोनिया गान्धीसँग पनि भेटवार्ताको पहल गरिरहेको बताइएको छ ।

ज्ञानेन्द्रले कांग्रेस नेता करण सिंह र गुजरातका मुख्यमन्त्री नरेन्द्र मोदीसँग भने भेट गरिसकेका छन् । सिंह दोस्रो जनआन्दोलनका बेला दल र राजावीच सम्बाद गराउन काठमाण्डौं आएका थिए ।

ज्ञानेन्द्रका स्वकीय सचिव सागर तिमिल्सीना र उनका सहपाठी प्रभु समशेर राणा पनि यतिबेला दिल्लीमै छन् । यसअघि पनि उनी पटक पटक बिहेको निम्तो मान्न भारत गएका थिए । भारतको जोधपुरमा त्रिभुवन पट्टीका नातेदारहरु वस्छन् ।